ᑭᕕᒃᓯᓕᕌᖓᕕᒃ ᑎᒦᓐ ᓴᓂᒧᑦ ᓵᑎᑉᐸᙱᓪᓗᒍ ᐅᕝᕙᓘᓐᓃᒃ ᑎᒍᒥᐊᕈᕕᒃ ᐅᖁᒪᐃᑦᑐᕈᓗᖕᒥ

ᖃᓄᖅ ᑐᑭᖃᕐᒪᓐ “ᑭᕕᓯᓂᖅ ᐊᒻᒪ ᓴᓂᒧᑦ ᓵᓐᓂᖅ”?

ᑭᕕᒃᓯᓚᐅᕐᓯᒪᕕᓐ ᐅᖁᒪᐃᑦᑐᒥᒃ ᐊᒻᒪ ᓵᓪᖢᑎᒃ ᐃᒡᓗᐊᓄᑦ ᐃᓯᒐᑎ ᐊᐅᓚᙱᖢᑎ? ᑕᐃᒪᐃᓕᑐᐃᓐᓇᕆᐊᖃᕐᓇᕐᒪᓐ ᐅᖁᒪᐃᑦᑐᒥᒃ ᑭᕕᒡᓯᓪᓗᓂ ᐊᒻᒪ ᑐᐊᐸᓕᕆᓪᓗᓂ ᐅᕝᕙᓘᓐᓃᑦ ᐳᐊᕆᔭᖅᖢᓂ ᐊᐳᑎᒥ. ᑕᐃᒪᓐᓇ ᐅᖁᒪᐃᑦᑐᓂᒃ ᑭᕕᒃᓯᖃᑦᑕᕐᓂᖅ ᐃᓚᖃᖅᖢᓂ ᓴᓂᒧᑦ ᐊᐅᓚᔾᔭᖕᓂᖅ ᐅᕝᕙᓘᓐᓃᑦ ᑐᓄᐃᑦ ᓴᓂᒧᑦ ᐊᐅᓚᔾᔭᒃᑎᒃᑯᕕᐅᒃ ᐋᓐᓂᕐᔪᐊᕈᓐᓇᕋᕕᑦ ᓄᑭᒐᓚᒃᑯᑦ ᐊᒻᒪ ᓴᐅᓃᑦ ᐊᑯᓐᓂᖏᑦᑎᒍᑦ (ᑕᐃᔭᐅᓂᕐᓴᐅᕙᒃᑐᖅ “ᓄᑭᓂᑦ ᐋᓐᓂᑎᑦᑎᔪᓐᓇᖅᑐᑦ”), ᓄᑭᒃᑯᑦ ᐋᓐᓂᕈᑎᓂᒃ, ᑎᒥᒧᑦ ᐃᒃᐱᒍᓱᒍᑎᓄᑦ, ᑐᓄᖕᓃᑦᑐᓄᑦ ᓴᐅᓂᒐᓚᖕᓄᑦ ᐃᓚᖃᖅᖢᓂ ᐅᕐᕈᐊᕐᓯᓂᒃᑯᑦ, ᓱᑲᖓᑲᑕᖕᓂᖅ ᐊᒻᒪ ᐳᕕᓕᕐᓯᒪᓂᕐᒥᒃ). ᐅᑯᐊ ᐋᓐᓂᕈᑎᐅᔭᑦᑐᑦ ᐊᒃᓱᐊᓗᒃ ᐋᓐᓂᕐᓇᕈᓐᓇᖅᑐᑦ, ᐊᑯᓂᕈᓗᒡᓗ ᐃᒃᐱᖕᓇᕐᓗᑎᒃ ᐊᒻᒪ ᓄᑭᖃᑦᑎᐊᕈᓐᓂᕐᓯᒪᓗᓂ.

2021-ᖑᑎᓪᓗᒍ ᓄᓇᕗᒥᑦ ᐊᒻᒪ ᓄᓇᑦᓯᐊᕐᒥ ᐅᖓᑖᓃᑦᑐᑦ 70% ᑭᕕᒃᓯᓂᕐᒧᑦ ᐋᓐᓂᕈᑎᐅᔪᑦ ᖃᓄᐃᓕᑳᓪᓚᖕᓂᑰᖓᓂᕐᒧᑦ ᑎᒥᒃᑯᑦ ᑖᓐᓇ ᐃᖅᑲᓇᐃᔭᖅᑎ ᑭᕕᒃᓯᓇᓱᒃᑎᓪᓗᒍ ᐅᖁᒪᐃᑦᑐᒥᓪᓘᓐᓃᑦ ᑎᒍᒥᐊᖅᑎᓪᓗᒍ ᐃᓚᖃᕐᓗᓂ ᓄᑭᒃᑯᑦ ᑕᖃᓯᒪᓂᕐᒥᒃ.

ᑭᓇ ᐅᓗᕆᐊᓇᖅᑐᒦᓛᖑᕙ?

ᐃᖅᑲᓇᐃᔭᕐᑎ ᑭᕕᒃᓯᓇᓱᖕᓂᒃᑯᑦ ᓈᒻᒪᙱᓕᐅᕈᑎᖃᑐᐃᓐᓇᕆᐊᓕᒃ, ᑭᓯᐊᓂᓕ ᐃᖅᑲᓇᐃᔮᖃᖅᑐᓂᒃ ᒪᑯᐊ ᐃᒡᓗᓕᐅᕐᓂᕐᒧᓐ ᐃᑲᔪᖅᑎᐅᕙᒃᑐᑦ ᐊᒻᒪ ᐃᖅᑲᓇᐃᔭᖅᑎᒋᔭᐅᔪᑦ, ᐱᓕᕆᕝᕕᖕᓄᑦ ᐊᒻᒪ ᓱᕋᒃᓯᒪᔪᓕᕆᓂᕐᒧᑦ ᐊᐅᓚᑦᑎᔩᑦ, ᓴᓗᒻᒪᕐᓴᐃᔩᑦ ᐊᒻᒪ ᐃᒡᓗᓂ ᑲᒪᔨᐅᕙᒃᑐᑦ, ᓂᐅᕕᕐᕕᖕᓂ ᐱᓕᕆᐊᖃᕐᑐᑦ ᐊᒻᒪ ᐃᓚᖏᑦ ᐋᓐᓂᐊᖅᑐᓕᕆᓂᕐᒥᒃ ᐱᓕᕆᐊᖃᖅᑐᑦ. ᐃᓚᖏ ᑖᒃᑯᐊ ᐃᖅᑲᓇᐃᔮᖑᕙᒃᑐᑦ ᐱᓕᕆᐊᖃᕐᓇᕐᒪᑕ ᑭᕕᒃᓯᑲᑕᒋᐊᖃᕐᓂᕐᒥ ᐊᒻᒪ ᓄᒃᑎᖅᑎᕆᑲᑕᖕᓂᕐᒥᒃ ᐱᖁᑎᓂᒃ ᐅᕝᕙᓘᓐᓃᑦ ᐃᓄᖕᓂᒃ. ᐅᑯᐊ ᓇᓗᓇᐃᒃᑯᑎᑦ ᐃᖅᑲᓇᐃᔭᖅᑎ ᖃᓄᐃᓕᑐᐃᓐᓇᕆᐊᖃᕐᓂᖓᓂᒃ ᑭᕕᒃᓯᑲᑕᖕᓂᕐᒧᑦ ᐊᒻᒪ ᓴᖑᑳᓪᓚᖕᓂᕐᒧᑦ ᕿᑎᐊᓄᑦ:

ᐊᐳᑕᐃᔭᐃᓗᓂ ᐳᐊᕆᓯᒧᑦ ᑐᐊᐸᖕᒥᓪᓘᓐᓃᑦ ᐳᐊᕐᕆᔭᑲᑕᒡᓗᓂ (ᑭᕕᒃᓯᓂᖅ) ᐊᓯᐊᓄᐊᕆᐊᕐᓗᒍ ᑎᒥ ᓴᖑᑎᓐᓂᖓᓄᑦ.
ᐅᖁᒪᐃᑦᑐᓂᒃ ᑭᕕᒃᓯᑲᑕᖕᓂᖅ ᐊᔭᐅᕈᑎᒥ (ᑭᕕᒃᓯᓂᖅ) ᐊᒻᒪ ᐃᓕᑦᑕᕐᓗᒋᑦ ᐃᓕᔾᔨᕕᒃᒧᑦ ᐃᓯᒐᑎ ᐊᐅᓚᔾᔭᓚᐅᙱᓪᓗᒋᒃ (ᓴᖑᑎᓐᓂᖅ).
ᐊᐅᓚᔾᔭᒃᑎᑦᑎᑲᑕᖕᓂᖅ (ᑭᕕᒃᓯᓚᐅᕐᓗᓂ ᐊᓯᐊᓄ ᓵᓪᓗᓂ) ᓯᑭᑑᕐᒥ ᐅᕝᕙᓘᓐᓃᑦ ᖃᒧᑏᖕᓂᒃ ᐊᔪᕐᓯᓯᒪᔪᓂᒃ ᐊᐳᑎᒧᑦ.
ᐃᒥᒐᕐᓂ ᐃᓗᐃᑦᑐᓂ ᑐᓂᓯᑲᑕᖕᓂᒃᑯᑦ ᐱᖁᑎᓂᒃ ᐅᒥᐊᕐᔪᐊᕐᒥᙶᖅᑐᓂᒃ ᐅᓯᖏᖅᑕᐅᕙᓪᓕᐊᔪᓂᒃ.

ᐃᖅᑲᓇᐃᔭᖅᑏ ᐊᕐᕌᒍᖃᕐᑐᑦ 25 ᐅᖓᑖᓂ ᐅᓗᕆᐊᓇᖅᑐᒦᓐᓂᕐᓴᐅᔭᑦᑐᑦ. ᐃᓐᓇᕈᖅᐸᓪᓕᐊᓪᓗᑕ ᓄᑭᕗᑦ ᒥᒃᖠᕚᓪᓕᖃᑦᑕᕐᒪᑕ ᐊᒻᒪᓗ ᑎᒥᕗᑦ ᓄᖑᑉᐸᓪᓕᐊᔪᓂᒃ ᐃᑲᔪᑲᐅᖅᑐᕈᓐᓇᙱᓐᓂᕐᓴᐅᓪᓗᑎᒃ. ᓄᑭᒃᑖᕆᕙᓪᓕᐊᔭᑎᒃ ᑎᓯᓂᕐᓴᐅᕙᖕᒪᑕ ᐊᒻᒪ ᐃᕙᓗᙳᐊᖃᐅᕐᓇᕐᓂᕐᓴᐅᓪᓗᓂ. ᓄᑮᑦ ᓄᙳᑉᐸᓪᓕᐊᕙᖕᓂᖏᑦ ᐊᔾᔨᒌᙱᑦᑑᑎᐅᖕᒥᔪᑦ ᐃᖅᑲᓇᐃᔭᖅᑎᑎᒍᑦ ᑕᐃᒪᓕ ᐃᓱᒪᔭᕆᐊᖃᙱᓚᑎ ᐊᔪᕋᓱᒋᓐᓈᓗᑎᒃ ᐊᕐᕌᒍᖏᓐᓄᑦ. ᑕᐃᒪᓕ ᐊᑐᓂ ᐃᖅᑲᓇᐃᔭᖅᑎᐅᔪᑦ ᐃᖅᑲᓇᐃᔭᕈᓯᖏᓐᓂᒃ ᐊᑐᕈᓐᓇᕆᐊᓖᑦ ᐊᔪᙱᓐᓂᖓᒍᑦ.

ᐊᒡᒐᖕᒧᑦ ᐱᓕᕆᐊᖃᑲᑕᖕᓂᖅ ᐱᖁᑎᓂᒃ

ᐅᕝᕙᐅᑯᐊ ᐃᓱᒪᒋᔭᕆᐊᖃᕐᑐᑦ ᐊᒻᒪ ᖃᐅᔨᒪᔾᔪᑎᒃᓴᑦ ᐅᓗᕆᐊᓇᙱᑦᑐᒦᓐᓂᕐᓴᐅᖁᓪᓗᑎ ᑭᕕᒃᓯᑲᑕᖕᓂᒃᑯᑦ.

ᐃᓱᒪᒋᔭᕆᐊᖃᕐᓂᖅ ᖃᓄᐃᓕᕈᑎᐅᔪᓐᓇᖅᑐᓂᒃ

ᐅᖁᒪᐃᓐᓂᖓ ᑭᕕᒋᐊᓕᐅᑉ (ᐅᕿᑉᐸ ᐅᕝᕙᓘᓐᓃᑦ ᐅᑭᙱᑉᐸ?).
ᐅᖓᓯᖕᓂᖓ ᑎᒥᖕᓄᑦ (ᖃᓄᑎᒋ ᖃᓂᑎᒋᕙ ᐅᕝᕙᓘᓐᓃᑦ ᐅᖓᓯᒃᑎᒋᕙ?).
ᐊᖏᓂᖓ ᐊᒻᒪ ᖃᓄᐃᓕᖓᓂᖓ (ᑎᒍᔭᒃᓴᐅᑎᐊᖅᐹ ᐅᕝᕙᓘᓐᓃᑦ ᐃᑲᔪᖅᑕᐅᔭᕆᐊᖃᖅᐱ?).
ᐅᖓᓯᖕᓂᖓ ᐊᒡᔭᕆᐊᖃᖅᑕᕐᓄᑦ (ᑭᕕᒃᓯᔾᔪᑎᒥ ᐊᑐᕆᐊᖃᕐᐲ ᐅᕝᕙᓘᓐᓃᑦ ᐊᓯᖓᓂᒃ?).
ᖃᓄ ᐊᑯᓂᐅᓇᔭᕐᒪᖔᑦ ᐊᒡᔭᕐᓂᖓ (ᕿᓚᒥᐅᓂᐊᖅᐹ ᐅᕝᕙᓘᓐᓃᑦ ᐊᑯᓂᐊᓗᒃ?).
ᖃᔅᓰᕐᓗᓂ ᑭᕕᒃᓯᑲᑕᒋᐊᖃᕐᓇᕐᒪᑦ (ᐅᓄᙱᑐᓂᒃ ᐅᕝᕙᓘᓐᓃᑦ ᐅᓄᖅᑐᓂᒃ?).
ᖃᓄᖅ ᓱᒃᑲᓕᑲᑕᖕᓂᐊᕐᒪᑕ (ᓱᒃᑲᓂᖓ ᑭᕕᒃᓯᑲᑕᖕᓂᕐᒧᑦ).

ᖃᐅᔨᕚᓪᓕᕈᑎᒃᓴ ᑭᕕᒃᓯᓗᓂ ᑐᓄᒃᑯᑦ ᐋᓐᓂᖅᑕᐃᓕᓂᕐᒧᑦ

ᑐᓄᐃᑦ ᑐᑭᓕᐊᖓᓗᒍ ᐊᒻᒪᓗ ᑎᒦᑦ ᓴᖑᖓᙱᓪᓗᒍ.
ᐊᒡᔭᖅᑕᐃᑦ ᑎᒥᖕᓄ ᖃᓂᒋᑎᓪᓗᒍ.
ᐊᓯᐊᓄᑦ ᕿᕕᐊᕐᓂᐊᕐᓗᑎᑦ ᐃᓯᖓᑎᑦᑕᐅ ᐊᐅᓚᔾᔭᖃᑕᐅᓗᑎᒃ ᓵᑕᕐᓄᑦ.
ᐊᓯᐊᓄᑦ ᕿᕕᐊᓕᕈᕕᑦ ᐅᒃᐸᑏᒃᑭᒃ ᓵᔾᔪᑎᒋᓗᒋᑦ.
ᐊᓪᓗᑲᑕᒡᓗᑎ ᖃᓂᒌᒃᑑᑎᓂᒃ.

ᖃᐅᔨᒪᔭᕆᐊᓖᑦ ᑭᕕᒃᓯᓂᐊᓵᕐᓗᓂ

ᓄᑭᒃᑎᑦ ᐊᑐᓕᒻᒪᒃᓴᓚᐅᕐᓗᒋᑦ! ᐅᓇ ᐱᒻᒪᕆᐅᓗᐊᕐᑐᖅ ᓂᒡᓚᓱᒃᑐᒥ ᐱᓕᕆᐊᖃᕐᓗᓂ ᓲᖃᐃᒻᒪ ᓄᑮᑦ ᓂᒡᓚᓕᕌᖓᑕ ᓱᑲᒃᑲᖓᓐᓇᓗᐊᕐᓇᕐᒪᑦ ᑎᒥᓕᒫᒃᑯᑦ. ᓱᑲᖓᔪᑦ ᓄᑮᑦ ᐅᓗᕆᐊᓇᕈᑎᐅᓂᕐᓴᑦ ᐋᓐᓂᕐᓂᐊᕆᐊᒃᓴᖅ.
ᐊᖅᑯᑎᒋᓂᐊᕐᑕᐃᑦ ᐊᖅᑯᑎᑦᑎᐊᕙᐅᑎᓪᓗᒍ ᓇᒧᙵᐅᑲᑕᖕᓇᕐᓗᓂ.

ᐃᖅᑲᓇᐃᔭᖅᑎᑦᑎᔨᐅᔪᑦ ᐊᒻᒪ ᑲᒪᔨᐅᔪᑦ ᖃᓄᖅ ᐋᖅᑭᒃᓯᓯᒪᔭᕆᐊᖃᕐᐸᓐ ᐱᖁᑎᓂᒃ ᐱᓕᕆᐊᖃᕐᕕᐅᔪᓂᒃ?

ᐱᖃᖅᑎᑦᑎᓗᑎᒃ ᐃᖅᑲᓇᐃᔭᖅᑎᓂᒃ ᐱᓕᕆᔾᔪᑎᓂᒃ ᓈᒻᒪᒃᑐᓂᒃ ᐅᖃᒪᐃᑦᑐᓕᕆᓂᕐᒧᑦ ᐅᕝᕙᓘᓐᓃᑦ ᑎᒍᒥᐊᒐᕐᓂᙱᑦᑐᓄᑦ ᐱᖁᑎᓄᑦ.
ᐅᕿᙱᓗᐊᖅᑐᓂᒃ ᐅᕿᒡᓕᑎᑦᑎᕚᓪᓕᕈᓐᓇᕐᓗᑎ ᑭᕕᒐᕐᓂᕐᓴᐅᓂᐊᕐᒪᑦ.
ᐃᖅᑲᓇᐃᔭᖅᑎᐅᔪᑦ ᐅᖁᒪᐃᓗᐊᖅᑐᓂᒃ ᑭᕕᒃᓯᑎᑦᑕᐃᓕᓗᒍ, ᑎᒍᒥᐊᖅᑕᐃᓕᓗᓂ ᐅᕝᕙᓘᓐᓃᑦ ᐅᖁᒪᐃᓗᐊᖅᑐᒥᒃ ᐊᓯᐊᓄᙵᐅᑎᑦᑕᐃᓕᓗᒍ, ᐊᖏᓗᐊᖅᑐᒥᓪᓘᓐᓃᑦ ᐅᕝᕙᓘᓐᓃᑦ ᑎᒍᒥᐊᒐᕐᓂᙱᓗᐊᖅᑐᒥᒃ.
ᐊᔪᕈᓐᓃᖅᓴᖅᑎᑦᑎᕙᒡᓗᓯ ᐅᓗᕆᐊᓇᙱᑦᑐᒃᑯᑦ ᑭᕕᒃᓯᖃᑦᑕᕐᓂᕐᒥᒃ, ᑎᒍᒥᐊᕈᓐᓇᕐᓂᕐᒥᒃ ᐊᒻᒪᓗ ᐅᖁᒪᐃᑦᑐᓂᒃ ᐊᓯᐊᓄᑦ ᓅᑎᕆᑲᑕᖕᓂᕐᒥᒃ.

ᐃᑲᔪᖅᑕᐅᒃᑲᓐᓂᕈᒪᒍᕕᑦ ᑕᒪᐅᓇ ᐱᕐᕈᓗᐊᕿᑦᑕᐃᓕᓂᕐᒥᒃ ᐱᓕᕆᔨᒧᑦ ᐅᖃᕈᓐᓇᖅᑐᑎᑦ ᐅᓪᓗᒥ ᓄᓇᕗᑦ ᐅᕝᕙᓘᓐᓃᑦ ᓄᓇᑦᓯᐊᕐᒥ.

ᐃᑲᔪᕈᑎᒃᓴᐃᑦ

ᐃᖅᑲᓇᐃᔭᖅᑎᐅᔪᑦ ᐱᓕᕆᐊᖃᖅᐸᒃᑐᑦ ᐱᖁᑎᓂᒃ ᖃᐅᔨᒪᔭᕆᐊᖃᕐᑐᑦ ᑭᕕᒃᓯᑦᑎᐊᕈᓐᓇᕐᓂᕐᒥᒃ ᐃᖕᒥᖕᓂᒃ ᑐᓄᒥᒍᑦ ᐋᓐᓂᖅᑎᑦᑕᐃᓕᓂᕐᒧᑦ. ᐅᖃᖃᑎᒋᓗᒍ ᑲᒪᔨᒋᔭᐃᑦ ᐃᖅᑲᓇᐃᔭᖃᑎᒋᔭᓪᓘᓐᓃᑦ ᖃᓄᖅ ᐋᖅᑭᒃᓱᐃᔪᓐᓇᕐᒪᖔᑦ ᐱᐅᓯᕚᓪᓕᖅᑎᑦᑎᓂᕐᒥᓪᓘᓐᓃᑦ ᑐᓄᒃᑯᑦ ᐋᓐᓂᖅᑕᐃᓕᓂᕐᒧᑦ ᒪᓕᒃᑕᐅᔪᓐᓇᖅᑐᓂᒃ. ᐃᓕᔅᓯᓐᓂ ᕿᒥᕐᕈᐊᖁᔨᔪᒍᑦ ᐆᒥᖓ ᓯᕗᓂᐊᒍᑦ ᐱᕐᕈᓗᐊᕿᑦᑕᐃᓕᓂᕐᒧᑦ ᑐᓴᐅᒪᔭᕆᐊᓕᖕᓂ ᐆᒧᖓ ᑐᓄᒃᑯᑦ ᐋᓐᓂᖅᑕᐃᓕᓂᖅᒥᒃ, ᓇᓗᓇᐃᔭᐃᓯᒪᖕᒪᑦ ᖁᑦᑎᖕᓂᖅᐹᑦ 6 ᑐᓄᒃᑯᑦ ᐋᓐᓂᖅᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᑦ. ᐅᓇ ᒪᒃᐱᒐ ᐃᑲᔪᕈᑎᒃᓴᒃᑲᓐᓂᕐᓂᒃ ᑎᑎᕋᐅᓯᖃᒃᑲᓐᓂᕐᑐᖅ!

ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (CCOHS) ᐃᑲᔪᕈᑎᒃᓴᐃᑦ:

ᐱᓕᕆᐊᖃᕐᓂᒃᑯᑦ ᐊᒡᒐᒧᑦ ᑲᒪᒋᔭᖃᕐᓂᕐᒥᒃ – ᓇᓗᓇᐃᔭᕐᓯᒪᔪᑦ 20 ᖃᓂᒋᔭᖓᓃᑦᑐᓂᒃ ᐅᖃᐅᓯᕐᓂᒃ ᐊᒃᑐᐊᔪᑦ ᐊᒡᒐᒧᑦ ᐱᖁᑎᓂᒃ ᑲᒪᒋᔭᖃᕐᓂᕐᒧᑦ, ᒪᑯᓂᖓ ᖃᑦᑕᐅᔭᕐᓂᒃ ᑭᕕᒃᓯᖃᑦᑕᕐᓂᕐᒥᒃ, ᐅᖁᒪᐃᑦᑐᓂᒃ ᒪᑯᑎᑐᓇᖅ ᖁᐊᒃᑯᕕᒃᑐᑦ ᕿᕕᒃᓯᕙᖕᓂᖅ ᐊᒻᒪ ᐊᒡᔭᖅᓯᕙᖕᓂᖅ ᐊᒻᒪᓗ ᖃᓄᐃᓕᖓᔭᕆᐊᖃᕐᓂᕐᒥᒃ ᐱᖁᑎᓂ ᐃᓂᖃᖅᑎᑦᑎᓂᕐᒥᒃ (ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ [CCOHS]).
ᐊᒡᒐᖕᒧᑦ ᐱᓕᕆᐊᖃᑲᑕᖕᓂᖅ ᐱᖁᑎᓂᒃ – ᐊᑭᕐᓇᕐᒥᐅᑕᖅ ᖃᓄᐃᓕᐅᕆᐊᖃᕐᓂᖅ ᐅᓗᕆᐊᓇᙱᑦᑐᒥᒃ ᑭᕕᒃᓯᓇᓱᒡᓗᓂ ᐃᖅᑲᓇᐃᔭᖅᕕᒃᒥᑦ (ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ [CCOHS]).
ᐳᐊᕐᕆᔭᖃᑦᑕᕐᓂᖅ ᐊᐳᑎᒥ – ᑐᓴᐅᒪᔭᐅᔭᕆᐊᓖᑦ ᐊᐳᑎᒥ ᐳᐊᕐᕆᔭᕐᓗᓂ, ᐊᒻᒪᓗ ᐊᐳᑎᓯᐅᑎᒥ ᐊᑐᖃᑦᑕᕐᓂᖅ ᐊᐳᑎᒧᑦ (ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ [CCOHS]).
ᐱᔨᑦᑎᕋᕐᓂᕐᒧᑦ ᑭᕕᒃᓯᓂᕐᒧᑦ ᖃᐅᔨᒪᔭᕆᐊᓖᑦ – ᐋᓐᓂᐊᖅᑐᓂᒃ ᑲᒪᔨᓄᑦ, ᐅᓇ ᑎᑎᖅᑲᖅ ᐱᕐᕈᓗᐊᕿᑦᑕᐃᓕᓂᕐᒥᒃ ᖃᐅᔨᑎᑦᑎᔾᔪᑎᒃ ᐃᓄᖕᓂ ᐊᓯᐊᓄᑦ ᓅᑎᕆᑲᑕᒃᑎᓪᓗᒋᑦ (ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ [CCOHS]).
ᓄᑭᒃᑯᑦ ᓈᒻᒪᙱᓕᐅᕈᑎᑦ – ᑐᓴᒐᒃᓴᑦ (ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ [CCOHS]).