COVID-19 Update

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᔭᓗᓇᐃᒥ ᐊᓪᓚᕕᖕᒐ ᒪᑐᓯᒪᔪᖅ ᐅᐸᒍᑎᔪᒪᔪᓄᑦ ᐱᒋᐊᖅᖢᓂ ᓯᑎᐱᕆ 9, 2021. ᑕᑯᒋᐊᕐᓗᒍ ᓄᕙᒡᔪᐊᕐᓇᖅ-19-ᒧᑦ ᒪᒃᐱᒐᖅ ᐱᔨᑦᑎᕋᐅᑎᓄᑦ ᐱᒻᒪᕆᖕᓂ ᑕᑯᔪᓐᓇᕐᓂᐊᕋᕕᑦ ᓄᑖᖑᓛᓂᒃ, ᐊᒻᒪᓗ ᓄᕙᒡᔪᐊᕐᓇᖅ-19 ᐃᑲᔫᑎᒃᓴᓄᑦ ᒪᒃᐱᒐᖅ ᐃᖅᑲᓇᐃᔭᕐᕕᖕᓄ ᐃᑲᔫᑎᐅᔪᓐᓇᖅᑐᓄᑦ.

ᓴᓇᕝᕕᖕᒧᑦ ᐅᑎᕐᓂᐊᕐᓂᕐᒧᑦ ᐊᐱᖅᑯᑕᐅᒐᔪᒃᑐᑦ

ᓱᓇᐅᕙ ᓴᓇᕝᕕᖕᒧᑦ ᐅᑎᕐᓂᐊᕐᓂᕐᒧᑦ ᐸᕐᓇᐅᑎ?

ᓴᓇᕝᕕᖕᒧᑦ ᐅᑎᕐᓂᐊᕐᓂᕐᒧᑦ ᐸᕐᓇᐅᑎ ᐊᑐᓂ ᐃᓄᖕᓄᑦ ᐸᕐᓇᐅᑕᐅᕙᒃᑐᖅ ᐋᓐᓂᖅᓯᒪᔪᓄᑦ ᓴᓇᔨᓄᑦ ᐃᓱᒪᒋᔭᖃᖅᑐᓄᑦ ᐱᓕᕆᐊᕆᔪᓐᓇᖅᑕᒥᒍᑦ ᑭᒡᓕᖃᖅᑎᑦᑎᔭᕆᐊᖃᕐᓂᕐᒧᑦ, ᐋᖅᑭᒃᐸᓪᓕᐊᔪᓐᓇᖁᑉᓗᒍ ᐅᕝᕙᓘᓐᓃᑦ ᐋᓐᓂᐊᕐᕕᒃᑯᑦ ᑲᒪᒋᔭᐅᓂᐊᖅᑎᓪᓗᒍ ᐸᕐᓇᐅᑎᓖᑦ, ᐊᒻᒪᓗ ᐊᑐᐃᓐᓇᐅᔪᑦ ᐱᓕᕆᐊᕆᔪᓐᓇᖅᑕᒥᓂᒃ ᐊᑐᕐᓗᑎᒃ ᓴᓇᔪᓐᓇᕐᓂᕐᒧᑦ. ᐸᕐᓇᐅᑎ ᐃᑲᔫᑕᐅᓲᖅ ᓴᓇᔨᒧᑦ ᓴᓇᐃᓐᓇᕈᓐᓇᖁᑉᓗᒍ ᐅᕝᕙᓘᓐᓃᑦ ᓴᓇᕝᕕᖕᒥᓄᑦ ᐅᑎᕈᓐᓇᖁᑉᓗᒍ ᐱᔪᓐᓇᖅᓯᑐᐊᕈᓂ ᐋᓐᓂᐊᕐᕕᒃᑯᑦ ᑲᒪᒋᔭᐅᓯᒪᓂᒃᑯᑦ ᐊᒻᒪᓗ ᐊᑦᑕᓇᖅᑐᖃᙱᑦᑐᒃᑯᑦ ᐱᔪᓐᓇᖅᓯᑐᐊᕈᓂ. 

ᐊᑐᕈᓐᓇᖅᐸᕌ ᓴᓇᕝᕕᖕᒧᑦ ᐅᑎᕐᓂᐊᕐᓂᕐᒧᑦ ᐃᑲᔫᑎ ᐋᓐᓂᓚᐅᕋᓗᐊᕈᒪ ᓴᓇᕝᕕᐅᙱᑦᑐᒃᑯᑦ?

ᐄ, ᐃᑲᔪᕆᐊᕈᓐᓇᕐᓂᖅ ᐊᑖᒍᑦ ᐃᓄᐃᑦ ᐱᔪᓐᓇᐅᑎᖃᕐᓂᖏᑦᑎᒍᑦ ᐱᖁᔭᒃᑯᑦ ᑐᕌᖓᓂᓕᒃ ᑕᒪᐃᓐᓄᑦ ᓴᓇᕝᕕᒃᑯᑦ ᓴᓇᕝᕕᒃᑰᙱᑦᑐᒃᑯᓪᓗ ᐱᔾᔪᑎᓕᖕᓂᒃ ᐋᓐᓂᕈᑕᐅᔪᓄᑦ. ᑭᓯᐊᓂᓕ, ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᐃᓚᐅᖃᑕᐅᓂᕆᓇᔭᖅᑕᖏᑦ ᐱᔾᔪᑎᖃᑐᐃᓐᓇᖅᑐᑦ ᓴᓇᕝᕕᖕᒥ ᐋᓐᓂᖅᑐᓄᑦ.

ᖃᖓ ᓴᓇᕝᕕᖕᒧᑦ ᐅᑎᕐᓂᐊᕐᓂᕐᒧᑦ ᐃᑲᔫᑎ ᐊᑐᓕᕋᔭᖅᐸ?

ᐱᓕᕆᐊᖑᔭᕆᐊᓖᑦ ᐱᓕᕆᐊᖑᑎᒋᐊᕐᓗᒋᑦ ᒫᓐᓇᑲᐅᑎᒋ ᓴᓇᕝᕕᖕᒥ ᐋᓐᓂᖅᑐᖃᖅᑎᓪᓗᒍ ᓇᓗᓇᐃᖅᑕᐅᒃᐸᓪᓘᓐᓃᑦ ᐋᓐᓂᕐᓂᖓᓄᑦ, ᐋᓐᓂᐊᓕᕐᓂᖓᓄᑦ, ᐅᕝᕙᓘᓐᓃᑦ ᐊᔪᕈᑎᖃᓕᕐᓂᖓᓄᑦ. 

ᑭᓇ ᐱᕙᓪᓕᐊᑎᑦᑎᕙᒃᐸ ᓴᓇᕝᕕᖕᒧᑦ ᐅᑎᕐᓂᐊᕐᓂᕐᒧᑦ ᐸᕐᓇᐅᑎᒥᒃ?

ᓴᓇᕝᕕᖕᒧᑦ ᐅᑎᕐᓂᐊᕐᓂᕐᒧᑦ ᐸᕐᓇᐅᑎ ᐱᓕᕆᐊᑎᒌᖕᓂᒃᑯᑦ ᓴᖅᑭᑎᑕᐅᓲᖅ ᐃᓚᐅᖃᑕᐅᑉᓗᑎᒃ ᒥᐊᓂᖅᓯᔨᖓ, ᓴᓇᔨ, ᔫᓂᐊᓐᑯᑦ (ᐱᖃᑕᐅᔭᕆᐊᖃᖅᐸᑕ), ᐋᓐᓂᐊᖅᑐᓕᕆᔨᒃᑯᑦ, ᐊᒻᒪᓗ ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ. ᐸᕐᓇᐅᑎ ᐊᔾᔨᐅᙱᑦᑑᖃᑦᑕᖅᑐᖅ ᓴᓇᔩᑦ ᐊᑐᓂ ᐃᓱᒪᒋᑉᓗᒋᑦ ᐊᒻᒪᓗ ᐃᓱᒪᒋᔭᖃᓲᖅ ᖃᓄᖅ ᐋᓐᓂᖅᓯᒪᓂᖏᓐᓄᑦ, ᖃᓄᐃᒍᓐᓃᖅᐸᓪᓕᐊᓂᐊᕐᓂᖏᓐᓄᑦ, ᐊᒻᒪᓗ ᐊᑐᐃᓐᓇᐅᔪᖃᕐᒪᖔᑦ ᐱᓕᕆᐊᕆᔪᓐᓇᖅᑕᖏᓐᓂᒃ. 

ᐋᓐᓂᖅᓯᒪᔪᖅ ᓴᓇᔨ ᐊᖏᕆᐊᖃᖅᐹ ᐱᓕᕆᐊᕆᔪᓐᓇᖅᑕᒥᓂᒃ?

ᐋᓐᓂᖅᓯᒪᔪᖅ ᓴᓇᔨ ᐱᓕᕆᐊᖃᕈᒪᙱᑉᐸᑦ ᐱᓕᕆᐊᕆᔪᓐᓇᖅᑕᒥᓂᒃ, ᐱᔾᔪᑎᒃᓴᒥᓂᒃ ᑐᓴᖅᑎᑦᑎᔭᕆᐊᓖᑦ ᓱᖕᒪᑦ ᐱᓕᕆᐊᕆᔪᒪᙱᒻᒪᖔᒍ, ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᓐᓄᑦ ᕿᒥᕐᕈᔭᐅᓕᕋᔭᖅᑐᖅ ᐊᒻᒪᓗ ᐃᓱᒪᒃᓴᖅᓯᐅᕈᑕᐅᓗᓂ. ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᐊᖏᖃᑎᖃᙱᑉᐸᑕ ᐋᓐᓂᖅᓯᒪᔪᒥᒃ ᓴᓇᔨᒥᒃ ᐊᒻᒪᓗ ᐅᒃᐱᕈᓱᒃᐸᑕ ᐱᓕᕆᐊᒃᓴᕆᔭᖓ ᓈᒻᒪᖕᓂᖓᓄᑦ, ᐋᓐᓂᖅᓯᒪᔪᖅ ᓴᓇᔨ ᐅᑎᕆᐊᖃᕋᔭᖅᑐᖅ ᓴᓇᕝᕕᖕᒥᓄᑦ. ᓴᓇᔨ ᐱᓕᕆᔪᒪᙲᓐᓇᖅᐸᑦ, ᓄᖅᑲᖓᑎᑕᐅᑐᐃᓐᓇᕆᐊᓕᒃ ᐲᖅᑕᐅᓗᑎᒡᓘᓐᓃᑦ ᐃᑲᔫᑎᒃᓴᖏᑦ. ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᓈᒻᒪᒃᓴᖅᐸᑕ ᐱᔾᔪᑎᖏᓐᓂᒃ, ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᐃᑲᔪᕆᐊᕋᔭᖅᑐᑦ ᓴᓇᕝᕕᖓᓂ ᓇᓗᓇᐃᔭᐃᓂᕐᒧᑦ ᐱᓕᕆᐊᕆᒃᑲᓐᓂᕈᓐᓇᖅᑕᖏᓐᓂᒃ.

ᑭᓇ ᐃᓱᒪᓕᐅᕆᖃᑦᑕᖅᐸ ᖃᖓ ᐋᓐᓂᖅᓯᒪᔪᖅ ᓴᓇᔨ ᓴᓇᕝᕕᖕᒥᓄᑦ ᐅᑎᕋᔭᕐᒪᖔᑦ?

ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᑐᓂᔭᐅᖃᑦᑕᕐᒪᑕ ᐋᓐᓂᐊᕐᕕᖕᒥ ᐅᓂᑉᑳᓕᐊᓂᒃ ᐃᓗᓕᖃᖅᑐᑦ ᐱᓕᕆᐊᖑᔪᓐᓇᖅᑐᓂᒃ ᐊᒻᒪᓗ ᖃᓄᖅ ᐋᓐᓂᐊᖃᕐᓂᖓᓄᑦ ᑐᑭᓯᒋᐊᕈᑎᒃᓴᓂᒃ ᐋᓐᓂᐊᖅᑐᓕᕆᔨᓂᒃ. ᓴᓇᑎᑦᑎᔨᒃᑯᑦ ᑐᑭᓯᒋᐊᕈᑎᒃᓴᓂᒃ ᑐᓂᔭᐅᓲᑦ ᐋᓐᓂᖅᓯᒪᔫᑉ ᒥᒃᓵᓄᑦ ᖃᓄᖅ ᐱᓕᕆᔪᓐᓇᕐᓂᖓᓄᑦ ᓇᓗᓇᐃᔭᐃᔪᓐᓇᖁᑉᓗᒋᑦ ᐱᓕᕆᐊᕆᔪᓐᓇᖅᑕᖏᓐᓂᒃ. ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᕿᒥᕐᕈᓂᖃᓲᑦ ᑕᒪᒃᑯᓂᙵ ᑐᑭᓯᒋᐊᕈᑎᒃᓴᓂᒃ ᓇᓗᓇᐃᔭᐃᓂᕐᒧᑦ ᖃᖓ ᓴᓇᔨ ᐊᑦᑕᓇᖅᑐᒃᑰᙱᓪᓗᓂ ᓴᓇᕝᕕᖕᒥᓄᑦ ᐅᑎᕈᓐᓇᕋᔭᕐᒪᖔᑦ.

ᐋᓐᓂᖅᓯᒪᔪᖅ ᓴᓇᔨ ᓴᓇᕝᕕᖕᒥᓄᑦ ᐅᑎᕈᓐᓇᖅᐹ ᖃᓄᐃᒍᓐᓃᓪᓚᑦᑖᖅᑳᖅᑎᓐᓇᒍ?

ᐄ! ᓴᓇᕝᕕᖕᒧᑦ ᐅᑎᕐᓂᐊᕐᓂᕐᒧᑦ ᐃᑲᔫᑎ ᐃᑲᔫᑕᐅᔪᖅ ᐋᓐᓂᖅᓯᒪᔪᒧᑦ ᓴᓇᔨᒧᑦ ᓴᓇᕝᕕᖕᒥᓄᑦ ᐅᑎᕈᓐᓇᖁᑉᓗᒍ ᐱᔪᓐᓇᖅᓯᑐᐊᕈᓂ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐊᑦᑕᓇᖅᑐᖃᙱᑦᑐᒃᑯᑦ

ᑕᐃᒪᓕ ᓴᓇᑎᑦᑎᔨᐅᔪᖅ ᑐᓴᖅᑎᑕᐅᒃᐸᑦ ᑕᐃᒪᐃᙱᑦᑐᓂᒃ ᐱᓕᕆᐊᕆᔪᓐᓇᖅᑕᖏᓐᓄᑦ ᑐᑭᓯᒋᐊᕈᑎᒃᓴᓂᒃ?

ᑐᓴᕐᕕᒋᒋᐊᕐᓗᒋᑦ ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᐅᖃᖃᑎᒋᔪᒪᓗᒋᑦ.

ᓴᓇᕝᕕᖓ ᖃᓄᐃᓕᒋᐊᖃᕋᔭᖅᐸ ᐋᓐᓂᖅᓯᒪᔪᖅ ᓴᓇᔨ ᐱᓕᕆᖃᑦᑕᓕᖅᐸᑦ ᑭᒡᓕᖃᕐᕕᖏᑦᑕ ᐅᖓᑖᒍᑦ ᒪᓕᒃᑕᐅᔭᕆᐊᓕᓪᓗ ᐅᖓᑖᒍᑦ?

ᐅᐸᑲᐅᑎᒋᓗᒍ ᓴᓇᔨ ᐊᒻᒪᓗ ᑐᑭᓯᑎᒋᐊᕐᓗᒍ ᐃᓱᒫᓘᑕᐅᔪᓂᒃ ᐋᓐᓂᐊᓕᕋᔭᕐᓂᖓᓄᑦ ᐊᑦᑕᓇᖅᑐᒦᓐᓇᔭᕐᓂᖓᓄᓪᓗ. ᓴᓇᔨ ᐅᖃᖅᐸᑦ ᐱᓕᕆᔪᓐᓇᕐᓂᕋᕐᓗᓂ ᒪᒥᓴᑦᑎᐊᕐᓂᖅᓴᐅᔪᓐᓇᕐᓂᐊᕐᓂᕐᒧᑦ, ᑐᓴᖅᑎᒋᐊᕐᓗᒋᑦ ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᐊᒻᒪᓗ ᐱᓗᒋᑦ ᐅᑉᓗᒥᒧᑦ ᐋᓐᓂᐊᕐᕕᖕᒥ ᑐᑭᓯᒋᐊᕈᑎᒃᓴᑦ ᑕᐃᒪᐃᑦᑐᓕᕆᔪᓐᓇᕐᓂᖓᓄᑦ ᐱᔾᔪᑎᓖᑦ.

ᓴᓇᑎᑦᑎᔨᐅᔪᑦ ᓱᖕᒪᑦ ᑎᑎᕋᖅᐸᓪᓕᐊᖏᓐᓇᕆᐊᖃᖃᑦᑕᖅᐸᑦ ᓱᓇᓗᒃᑖᓂᒃ?

ᑎᑎᕋᖅᐸᓪᓕᐊᓂᖅ ᐊᑐᐃᓐᓇᕈᖅᑎᑦᑎᕙᖕᒪᑦ ᓇᐃᓪᓕᒋᐊᖅᓯᒪᔪᒃᑯᑦ ᖃᓄᐃᓕᐅᕈᑕᐅᓯᒪᔪᓂᒃ ᐅᖃᖃᑎᒌᒍᑕᐅᓯᒪᔪᓂᒃ, ᐋᓐᓂᕐᓂᖓᓄᑦ, ᐊᒻᒪᓗ ᓴᓇᕝᕕᖕᒧᑦ ᐅᑎᕐᓂᐊᕐᓗᓂ ᖃᓄᐃᓕᐅᕈᑎᓂᒃ. ᑕᒪᓐᓇ ᐃᑲᔫᑕᐅᕙᒃᑐᖅ ᖃᓄᐃᓕᒋᐊᕈᑕᐅᒃᑲᓐᓂᕈᓐᓇᕋᔭᕐᒪᖔᑦ ᐊᒻᒪᓗ ᐊᑐᐃᓐᓇᕈᖅᑎᑦᑎᓯᒪᕙᒃᖢᓂ ᖃᓄᐃᓕᐅᕈᑕᐅᓯᒪᔪᓂᒃ ᐱᓕᕆᕝᕕᖕᒥᒃ ᑲᒪᔨᐅᓚᐅᖅᑐᓂᒃ ᓄᖅᑲᖅᑐᖃᕐᓂᖅᐸᑦ. ᑎᑎᕋᖅᐸᓪᓕᐊᓂᖅ ᐃᑲᔫᑕᐅᔪᓐᓇᖅᑐᖅ ᓇᓗᓇᐃᖅᓯᒍᑕᐅᓗᑎᒃ ᕿᒥᕐᕈᓂᒃᑯᑦ, ᐅᓐᓂᕐᓗᒍᑎᒃᑯᑦ, ᐅᕝᕙᓘᓐᓃᑦ ᐃᓄᐃᑦ ᐱᔪᓐᓇᐅᑎᖏᑦᑎᒍᑦ ᖃᓄᒃᑲᓐᓂᖅ ᐃᑲᔪᕆᐊᖅᑎᑦᑎᔨᓄᑦ ᐱᔭᕆᐊᖃᕈᑎᒃ.

ᖃᓄᐃᓕᐅᕋᔭᖅᐳᖓ ᓴᓇᔨ ᐅᑎᖅᐸᑦ ᒪᓕᒋᐊᖃᖅᑕᖏᓐᓂᒃ ᐱᓯᒪᙱᓪᓗᓂ ᑭᓯᐊᓂ ᖃᑯᒍᙳᖅᑎᓪᓗᒍ ᓴᓇᓂᕐᒧᑦ ᐃᑲᕐᕋᕆᔭᖏᑦ ᖃᑉᓰᓐᓇᕈᕆᐊᖅᑕᐅᔭᕆᐊᖃᖅᐸᑕ?

ᑕᑯᒋᐊᕐᓗᒍ ᓴᓇᔨᐅᔫᑉ ᐱᓕᕆᐊᕆᔪᓐᓇᖅᑕᖏᓐᓄᑦ ᑕᑕᑎᕈᑎ. ᓴᓇᔨ ᒪᓕᒋᐊᖃᖅᑕᖏᓐᓂᒃ ᐋᖅᑭᒃᓱᕈᔾᔭᐅᓯᒪᙱᑉᐸᑦ ᐃᑲᕐᕋᖏᑦ ᖃᑉᓰᓐᓇᕈᖅᑕᐅᔭᕆᐊᖃᕋᔭᙱᑦᑐᑦ. ᑭᓯᐊᓂᓕ, ᐋᓐᓂᐊᖅᑐᓕᕆᓂᒃᑯᑦ ᖃᓄᐃᓐᓂᖏᑦ ᐊᓯᔾᔨᖅᐸᒃᑐᑦ. ᖃᐅᔨᒋᐊᕐᕕᒋᓗᒋᑦ ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᑐᓴᕐᕕᒋᒋᐊᕐᓗᒋᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑐᑭᓯᒋᐊᕈᑎᒃᓴᒃᑲᓐᓂᕐᓂᒃ ᐱᑕᖃᒃᑲᓐᓂᙱᒃᑲᓗᐊᕐᒪᖔᑦ ᐊᒃᑐᖅᓯᓂᐅᓇᔭᖅᑐᓂᒃ ᓴᓇᔨᐅᑉ ᐱᓕᕆᐊᕆᔪᓐᓇᖅᑕᖏᓐᓄᑦ. 

ᓴᓇᔨ ᓴᓇᔪᓐᓃᖅᑎᑦᑐᓐᓇᖅᐸᕋ?

ᓈᒻᒪᒃᓯᖁᓪᓗᒋᑦ ᐃᖃᓇᐃᔭᖑᔭᕆᐊᓕᑦ ᐱᖃᓯᐅᑎᓯᒪᓗᓂ, ᐃᓚᒋᔭᐅᔭᕆᐊᖃᕐᒥᒐᕕᑦ ᑎᑭᐅᑎᓗᑎᑦ ᐊᒃᓱᕈᓇᕐᓂᐋᓗᐊᓄᑦ. ᑕᒪᓐᓇ ᐃᓚᐅᖃᑕᐅᑎᑦᑎᔪᖅ ᐋᖅᑭᒋᐊᖅᓯᓂᕐᒧᑦ ᐱᓕᕆᐊᒃᓴᖏᓐᓂᒃ ᐊᒻᒪᓗ ᓴᓇᕐᕈᑎᖏᓐᓂᒃ ᑕᑯᒋᐊᕆᐊᖃᕐᓂᖅ ᐊᓯᖏᓐᓂᒃ ᐱᓕᕆᐊᒃᓴᕆᔪᓐᓇᖅᑕᖏᓐᓂᒃ ᒪᓕᒡᓗᑎᒃ ᓴᓇᔨᐅᑉ ᐊᔪᙱᓐᓂᕆᔭᖏᓐᓄᑦ, ᐃᓕᓐᓂᐊᖅᓯᒪᓂᖓᓄᑦ, ᐊᒻᒪᓗ ᐱᓕᕆᐊᕆᔪᓐᓇᖅᑕᖏᓐᓄᑦ. ᑐᓴᐅᒪᔾᔪᑎᓕᕆᔨᒃᑯᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐱᓕᕆᐊᖑᔪᓂᑦ ᐊᐅᓚᑦᑎᔨ ᐱᒻᒪᕆᐋᓗᖕᒪᑦ ᐃᑲᔪᕈᓐᓇᑐᐃᓐᓇᕆᐊᖃᕐᓂᖓᓄᑦ ᐃᓕᑦᓯᓐᓂᑦ ᐊᒻᒪᓗ ᐃᖃᓇᐃᔭᖅᑎᒥᑦ.

ᖃᓄᖅ ᑐᑭᖃᖅᐸ ᐋᓐᓂᐊᓯᐅᖅᑎ ᐅᖃᖅᐸᑦ ᓴᓇᔨ ᑭᒡᓕᖃᖅᑐᒃᑯᑦ ᐱᓕᕆᔪᓐᓇᖅᓯᓂᖓᓄᑦ, ᐅᕿᓐᓂᖅᓴᒃᑯᑦ, ᕿᑎᐊᒍᑦ, ᐅᕝᕙᓘᓐᓃᑦ ᐅᖁᒪᐃᓐᓂᖅᓴᒃᑯᑦ ᐱᓕᕆᔭᕆᐊᖃᕐᓂᖓᓄᑦ?

ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᐃᒪᓐᓇ ᑐᑭᓕᐅᕆᓯᒪᓲᑦ:

• ᑭᒡᓕᖃᖅᑎᑦᑎᓂᖅ – ᐅᖁᒪᐃᓐᓂᓖᑦ 5 ᑭᓗᒑᒻᒥᒃ (11 ᐸᐅᓐᔅ)

• ᐅᕿᓐᓂᖅᓴᒃᑯᑦ – ᐱᓕᕆᓂᐅᔪᑦ ᐃᓚᐅᖃᑕᐅᑎᑦᑎᕙᒃᑐᑦ ᑲᒪᓂᕐᒧᑦ ᐅᖁᒪᐃᓐᓂᓕᖕᓂᒃ 5 ᑭᓗᒑᒻᒥᒃ 10 ᑭᓗᒑᒻᒧᑦ (11 ᐸᐅᓐᔅᒥᒃ 22 ᐸᐅᓐᔅᒧᑦ)

• ᕿᑎᐊᒍᑦ – ᐱᓕᕆᓂᐅᔪᑦ ᐃᓚᐅᖃᑕᐅᑎᑦᑎᕙᒃᑐᑦ ᑲᒪᓂᕐᒧᑦ ᐅᖁᒪᐃᓐᓂᓕᖕᓂᒃ 10 ᑭᓗᒑᒻᒥᒃ 20 ᑭᓗᒑᒻᒧᑦ (22 ᐸᐅᓐᔅᒥᒃ 44 ᐸᐅᓐᔅᒧᑦ

• ᐅᖁᒪᐃᓐᓂᖅᓴᒃᑯᑦ – ᐱᓕᕆᓂᐅᔪᑦ ᐃᓚᐅᖃᑕᐅᑎᑦᑎᕙᒃᑐᑦ ᑲᒪᓂᕐᒧᑦ ᐅᖁᒪᐃᓐᓂᓕᖕᓂᒃ 20 ᑭᓗᒑᒻ ᐅᖓᑖᓂ (ᐅᖓᑖᓂ 44 ᐸᐅᓐᔅᒧᑦ)

ᐊᐱᖅᑯᓯᒃᓴᖃᕈᑉᓯ ᖃᓄᖅ ᓴᓇᔨ ᐱᓕᕆᔪᓐᓇᕐᒪᖔᑦ ᐊᐅᓚᖃᑦᑕᕐᓗᓂ ᐊᒻᒪᓗ ᑭᒡᓕᖃᕐᕕᒋᔭᖏᑦ ᒪᓕᒋᐊᖃᖅᑕᖏᓪᓗ ᐱᔾᔪᑎᒋᑉᓗᒋᑦ ᖃᐅᔨᒋᐊᕐᕕᒋᓗᒋᑦ ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ.

ᖃᓄᖅ ᐊᑯᓂᐅᑎᒋᔪᖅ ᓴᓇᑎᑦᑎᔨᐅᔪᖅ ᐊᑐᐃᓐᓇᐅᑎᑦᑎᔭᕆᐊᖃᖅᐸ ᓴᓇᕝᕕᖕᒧᑦ ᐅᑎᕐᓂᐊᕐᓗᓂ ᐸᕐᓇᐅᒻᒥᒃ?

ᐃᓄᐃᑦ ᐊᑐᓂ ᐊᔾᔨᒌᙱᑦᑐᒃᑯᑦ ᐋᖅᑭᒃᐸᓪᓕᐊᓂᖃᖃᑦᑕᕐᒪᑕ, ᐊᒻᒪᓗ ᑭᒡᓕᖃᕐᕕᖃᖃᑦᑕᕐᒪᑕ ᐊᔾᔨᒌᙱᑦᑐᓂᒃ ᐋᓐᓂᖅᓯᒪᓂᕆᔭᖏᑦ ᐋᓐᓂᐊᕐᓂᕆᔭᖏᓪᓘᓐᓃᑦ ᒪᓕᒃᖢᒋᑦ. ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᑦ ᐊᑐᖃᑦᑕᖅᑐᑦ ᓂᕆᐅᒋᔭᒃᑯᑦ ᐋᖅᑭᒃᐸᓪᓕᐊᓂᕐᒧᑦ ᒪᓕᒃᑕᒃᓴᓂᒃ ᐊᔾᔨᒌᙱᑦᑑᑕᐅᔪᒃᑯᑦ ᐋᓐᓂᕈᑕᐅᕙᒃᑐᒃᑯᑦ ᐋᖅᑭᒃᐸᓪᓕᐊᔾᔪᑎᓄᑦ ᓂᕆᐅᒋᔭᐅᔪᓄᑦ ᐊᒻᒪᓗ ᓇᓗᓇᐃᔭᐃᓲᑦ ᖃᓄᖅ ᐋᓐᓂᐊᖃᕐᓂᖓᓄᑦ ᐊᒻᒪᓗ ᐋᖅᑭᒃᐸᓪᓕᐊᓂᐊᕐᓂᖓᓄᑦ ᑕᒪᑐᒨᓇ ᑐᑭᓯᒋᐊᕈᑎᒃᑯᑦ. 

ᑭᓇ ᓴᓇᔨᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᔨᒃᑯᑦ ᓇᓪᓕᐅᒃᑯᒫᖅᑖᖅᑎᑦᑎᔩᓪᓗ ᑲᒪᔨᒃᑯᓐᓂᒃ ᐃᑲᔪᕈᓐᓇᖅᐸ?

ᐃᑲᔪᖅᑕᐅᔭᕆᐊᖃᕈᕕᑦ ᓴᓇᕝᕕᖕᒧᑦ ᐅᑎᕈᒫᕐᓂᐊᕐᓂᕐᒧᑦ ᐃᑲᔫᑎᒃᑯᑦ ᐱᕙᓪᓕᐊᑎᑦᑎᓂᕐᒧᑦ ᐊᑐᓕᖅᑎᕆᓂᕐᒧᓪᓗ, ᖃᐅᔨᒋᐊᕐᕕᒋᓗᒍ ᓴᓇᕝᕕᖕᒧᑦ ᐅᑎᕈᒫᕐᓂᕐᒧᑦ ᖃᐅᔨᒪᔨᒋᔭᐅᔪᖅ. 

ᐊᐱᖅᑯᓯᒃᓴᖃᕈᕕᑦ ᐅᕝᕙᓘᓐᓃᑦ ᐃᑲᔪᖅᑕᐅᔭᕆᐊᖃᕈᕕᑦ ᓇᓕᐊᒃᑯᑐᐃᓐᓇᖅ ᑐᒃᓯᕋᐅᑎᒃᑯᑦ, ᖃᐅᔨᒋᐊᕐᕕᒋᓗᒍ ᐱᓕᕆᐊᖑᔪᒃᑯᑦ ᐊᐅᓚᑦᑎᔨ ᐅᕝᕙᓘᓐᓃᑦ ᐊᖏᖃᑎᒌᒃᑎᑦᑎᔨ.

ᐃᑲᔪᖅᑕᐅᔭᕆᐊᖃᕈᕕᑦ ᐊᑦᑕᓇᖅᑐᒦᖁᓇᑎᑦ ᐃᑲᔫᑎᒃᑯᑦ ᐊᒻᒪᓗ ᖃᐅᔨᓴᐃᔭᕆᐊᖃᕐᓂᕐᒧᑦ ᐱᕐᕈᓗᐊᕿᓂᐅᓯᒪᔪᒥᒃ ᐊᒻᒪᓗ ᐊᐅᓚᑦᑎᓂᕐᒧᑦ ᐅᓗᕆᐊᓇᖅᑐᓂᒃ, ᖃᐅᔨᒋᐊᕐᕕᒋᓗᒍ ᐋᓐᓂᖅᑕᐃᓕᒪᑎᑦᑎᓂᕐᒧᑦ ᐱᔨᑦᓯᕋᖅᑎᒃᑯᑦ. 

ᓄᓇᑦᓯᐊᖅ: 1-800-661-0792

ᓄᓇᕗᑦ: 1-877-404-4407

ᐃᑲᕐᕋᓄᑦ−24-ᓄᑦ ᖃᓄᐃᑦᑐᕕᓂᕐᓂ ᐅᓂᒃᑳᓕᐅᕐᓂᕐᒧᑦ ᐅᖃᓗᒡᕕᒃᓴᖅ: 1-800-661-0792